« 1 af 5 »

Tók þessar myndir í liðinni viku á leið um Súðavíkurhlíðina. Hér eru framkvæmdir í góðum höndum og ýmsilegt að gerast í rétta átt. Það er hins vegar ljóst að þetta mun þurfa að þjóna vegfarendum sem eini kostur að vetri til þegar færðin verður þyngri og snjósöfnun verður í hlíðinni. Ekki stendur til að hafa á áætlun til 15 ára (drögum í samráðsgátt) göng milli Álftafjarðar og Skutulsfjarðar.

Ég fyrir mitt leyti lýsi þeirri skoðun minni, að með drögum að áætlun til 15 ára hefði mátt slá keilur og láta í það skína að vilji væri fyrir því hjá ráðuneyti Samgöngu- og sveitarstjórna að sameiningaráform næðu til sveitarfélaganna sem heildar. Það hefði mátt gera, þó ekki hefði verið nema til að láta í það skína að fullur vilji væri til þess að veita sveitarfélögunum brautargengi hér á norðanveðrum Vestfjörðum til sameiningar, enda þó auðvitað væru mörg ár í efndir. Mér hefði þótt það klókari leikur þar sem ráðuneyti samgöngu og sveitarfélaga er samtvinnað undir einum og sama ráðherra.

Ég gleðst yfir þeirri yfirlýsingu bæjarstjórnar Ísafjarðarbæjar að hafa orðið fyrir vonbrigðum með að "Súðavíkurgöngin" hafi ekki ratað inn í áætlunina. Þar sem það er þegar sagt læt ég nægja að taka undir það enda mörgum heyrinkunnugt, sumt þarf ekki að færa í mörg eða oft, hlíðin hefur áður borist í tal.

Ég vona að veturinn verði snjóléttur og það sem fjallið skilar niður á Súðavíkurhlíð muni sem mest nema staðar við þau þil sem verið er að reka niður og stöðvast þar. Það er þó bara óskhyggja mín, en framtíðarlausn á samgöngum um hlíðina geta ekki falist í vegskálum einum til heilsárs. Þessi hlíð er brött og geymir illa snjó auk þess sem þyngdaraflið togar allt laust niður í vatnsveðrum.

Ég hvet ykkur til þess að fara inn á samráðsgátt stjórnvalda - allir þeir sem hafa á þessu skoðun og telja að málið varði þá með einum eða öðrum hætti eiga að setja þar inn skoðun. Sjá hér samráðsgátt stjórnvalda. Um leið gleðst ég yfir því sem unnið er á hlíðinni og má glöggt sjá að mikið hefur verið gert í rétta átt.   

Bragi Þór Thoroddsen 

Auglýsing aðalskipulags Súðavíkurhrepps 2018-2030 og deiliskipulag fyrir Langeyri og Hattardal

Frá og með 16. október 2019 verða í opnu auglýsingar- og athugasemdarferli aðalskipulag Súðavíkurhrepps, deiliskipulag iðnaðar- og athafnasvæðis Langeyrar og deiliskipulag fyrir Hattardal.

Auglýst er til samræmis við 31. og 1. mgr. 41. gr. skipulagslaga nr. 123./2010. Auglýsingaferlið er opið í 6 vikur sbr. ákvæði sömu laga.

Opið er fyrir athugasemdir frá 16. október 2019 til og með 27. nóvember 2019.

Unnt er að nálgast tillögurnar hér á heimasíðu undir viðeigandi tenglum. 

Þeir sem hafa hagsmuna að gæta og láta sig aðalskipulagstillögu eða deiliskipulögin varða geta gert skriflegar athugasemdir. Þeim er bent á að hafa samband við Jóhann Birki Helgason, skipulags- og byggingarfulltrúa að Hafnarstræti 1 - 400 Ísafirði. Jafnframt er unnt að senda inn erindi á Súðavíkurhrepp á sudavik@sudavik.is. Skipulagstillögur eru til sýnis í húsnæði Súðavíkurhrepps að Grundarstræti 1 - 420 Súðavík. 

Aðal- og deiliskipulagstillögur eru jafnframt aðgengilegar hjá Skipulagsstofnun (skipulag.is og sýningarrými stofnunarinnar), en Skipulagsstofnun er til húsa að Borgartúni 7b - 105 Reykjavík.

Íbúar Súðavíkurhrepps og þeir aðrir sem telja sig hafa hagsmuni eru hvattir til þess að kynna sér tillögurnar og gera athugasemdir eftir því sem við á. 

Fyrir hönd Súðavíkurhrepps,

Bragi Þór Thoroddsen sveitarstjóri